Ekaineko triatloiak

Dagoeneko Ekainean sartzera goaz eta lasterketa aldetik hau izango da hilabeterik gogorrena. Azkenengo momentuan Laredoko triatloi olinpikoan izena ematea erabaki dut (www.triatlonlaredo.es), horrela 4 triatloi egingo ditut hilabete honetan: Ekainak 1 Ondarroa, Ekainak 8 Zarautz, Ekainak 15 Laredo eta Ekainak 30 Onditz. Uztaileko lehenengo astean seguruenik Garaikoa egingo dut. 6 astetan 5 triatloi izango dira, eta espero dut Gasteizerako kalitatezko entrenamentuak izatea.

Hilabete honetan egurra jasotzea tokatuko zait, Uztailean berriz intentsitatea zein bolumena zertxobait jaitsi eta Gasteizerako gorputzak atseden pixka bat hartu beharko du.

58 egun... tick tack tick tack tick tack.....

Bilboko triatloia

Larunbatean Bilboko Triatloian hartu nuen parte. Denboraldiko lehenengo IronMan erdia nuen  (1,9 - 90 - 21) eta sentsazioak onak ziren. Eguraldia aste hasieratik bagenekien oso txarra izango zela eta IronMan erdi batek duen gogortasunaz gain, horri ere aurka egitea tokatu zitzaigun. 

 12:20an eman zitzaion irteera igeriketako segmentuari. Izena emandako 700 parte hartzailetatik 153 ez ziren irteera gunera agertu. Eguraldiagaitik? Ba nire ustez gehiengoak bai! Irteera eman eta lehendabiziko 750 metroak uraren norantzan egin genuen igeri eta Geggenheim pare horretan bi boya eskubitara utziz beste 1.250 metro uraren norabidearen aurka. Uraren tenperatuta 14,4º tan zegoela esaten zuten antolatzaileek (aurreko egunean neurtuta), baina bertan parte hartzaile batek neurtu omen zuen eta 11-12º bitartean aurkitzen omen zen (Legeen arabera 13º tik behera debekatuta dago igeriko sektorea egitea). Hainbat lasterkari uretatik atera behar izan zuten hiportermiak jota. Gurutze Gorriaren arabera 100 bat izan ziren eta bat ospitalera eraman behar izan zuten. Atera kontuak nolako hotza zegoen ure. Gainera uretako sektorea asko luzatu zitzaigun. Lehengo urtean Getxoko IronMan erdian 38 minutu inguru behar izan banituen 1,9 kilometroko igeriketa burutzeko, Bilbon distantzia berbera egiteko 48 minutu inguru!

Uretatik irten eta eskailerak hala moduz igo ondoren, nire boxesetarako gunera iritsi nintzen bista erdi borroso nuela. Trantzisioan bizikletarako erropak hartu (Txalekoa eta mangitoak) eta bizikletako ibilbideari ekin nion. Lehenengo 15 kilometroetan oso ondo moldatu nintzen. Akoplatuta joateko aprobetxatu nuen ia laua bai zen ibilbidea, baina Bibero igotzen hasi eta orduan lanak. Pixkanaka nire erritmoa aurkitzen joan nintzen eta mendatea gustura igo nuen. Ondoren beste mendikoxkor bat eta berriz ere Bibero. Mendatea nolakoa zen banekienez buruarekin jokatu eta hasieratik neure erritmoa hartzen ahalegindu nintzen mendatea gusturago igotzeko. Bibero jaitsi eta berriz ere boxesetan nintzen. Ia 28 km/h-ko bataz besteko abiadura eta 3 ordu eta 13 minutuko denbora 90 kilometroko ibilbidea burutzeko. Denbora ia guztian euria egin zigun eta haizeak jotzen zuenean hezurrak ere hoztu egiten zitzaizkidan. Sekulako hotza!

Bizikleta utzi, aldaketa nahiko azkarra egin eta 21 kilometro lasterka! Uf, oraindik mundu bat nuela aurretik sentitzen nuen, edozer gerta zitekeen kilometro guzti hoietan zehar. Lehenengo 4-5 kilometroa 4:20ko erritmora! Benetan harriturik neure buruarekin. Gainera errez nindoala ematen zuen, baina aspaldian lagun dudan iskioko miña eta horren lengusua den hanka berdiñeko bolako molestia segituan agertzen joan ziren. Benetan zaila zela ikusten nuen erritmo hoietara mantentzea. Nahiz eta pixkanaka erritmoa jaisten joan, niretzat oso onak diren erritmoak mantendu nituen. Azkenean 4:38ko bataz besteko erritmoa. Sailkapenaren arabera 40 postu aurreratu nituen korrikako segmentuan. Nik gehiago zirelakoen nengoen pasatu nuen jende pilla kontutan hartuta. Azkenean 5h 43' 06'' eta 129. postuan. Benetan oso gustura! Sailkapenean erditik aurrera eta korrikako segmentuko sentsazio oso honekin, nahiz eta eskubiko hankan aspaldian dudan molestiak hor jarraitzen duen.

ARGAZKIAK
SAILKAPENA

Igande gabean botaka egitera esnatu nintzen. Astelehena gaixo eta Asteartean hala moduz. dagoeneko entrenamentuekin jarraitzen dut. Hurrengo astean Ondarru %85era eta Ekainak 8an urteko bigarren helburua egitera. Zarauzko IronMan erdia!


PD1. Eskerrikasko Jon Kepa Zarrabe! Zu bezelako irakurle fiñek bloga eguneratzeko indarrak ematen dizkidate eta jeje.

PD.2 Ez nuke amaitu nahi aipatu gabe interneten topatu ditudan eta hainbeste gustatzen zaizkidan hainbat eta hainbat argazki. Benetan harro sentitzen naiz kirol honen parte izateagaitik. Triatloia hiru kirol baino zerbait gehiago dela gero eta argiako daukat, ;)

 

Denboraldiko lehenengo triatloia: Senpere

Joan den Igandean Iparraldean izan nintzen Senpereko triatloi olinpikoa (1,5 - 40 - 10) egiten. Akerra, Txartxa, Apalantza eta ni izan giñen Azkoitiko Triatloi Taldetik gerturatu giñen taldekideak.  Denboraldiko lehenengo triatloia nuen eta beti bezala hasi aurretik betiko nerbioak agerian ziren. Azkeneko egunetan nahiko sentsazio onak izan nituen entrenamenduetan eta nahiz eta sarritan hankak erdi nekatuta antzematen ditudan, uste nuen gauzak nahiko txukun egiteko moduan nintzela.

Igerian bertako lakuan egiten zen eta egia esan parajea ezin hobea zen. Irteera eman eta hasieratik ez nindoan espero edo nahi bezala, hala eta guztiz ere nahiko txukun egin nituen 750 metroko bi bira (nik aukeran beti nahiago izaten dut buelta bakar batera izatea...) Uretatik irten eta neoprenoa ezin kenduta boxesetara abiatu nintzen. Boxesak aldapa behera zeuden eta harri txintxorrez beterik zegoen lurra! Trantsizioa ahal nuen azkarrena egin eta bizikletari ekin nion.

Bizikletan 20 kilometroko bi buelta ziren eta egia esan espero baino gogorragoak. Lehenengo kilometroak egin orduko lehenengo aldapa koxkorrak agertu ziren. Lehenengo kilometroetan hainbat lasterkari pasatu nituen, baina aldapatxoak hasi orduko konturatu nintzen hankak nekatu xamar zeudela hasieratik horrelako egurra sartzeko. Erritmoa zertxobait jeitsi nuen eta naiz eta jendea aurreratzen jarraitu gehiago ziren ni aurreratzen nindutenak. Lehenengo bira amaitu eta argi neukan bigarren bira hobetoago eta azkarrago joango zela. Bigarren biran ia iñortxok ere ez ninduen pasa eta aldiz 5 bat pasatu nituen. Bizikleta gogorra egin zitzaidan!

Bizikleta utzi eta hasiera batean gustuen aurkitzen naizen korrikako segementuari ekin nion. Lehenengo kilometro terdiak oso ondo, erritmo biziz, baina orduan tripako miña hasi zitzaidan... pauso bat, bi hiru... miña areagotzen zijoan eta erretiratu beharra izango nuela pentsatu nuen. Momentu horretan burura etorri zitzaizkidan orain arte 3 urte hauetan egin ditudan ia 60 lasterketetan behin ere ez naizela bide bazterrean botata geratu eta lehenengo aldiak ez zuela iritsi behar Senperen. Aurrera jarraitu behar nuela erabaki nuen eta 200-300 bat metro oinez egin ondoren berriz ere korrika egiteari ekin nion eta tripako miñik ez zen ageri ia. Gero eta hobetoago sentitzen nijoan heinean erritmoa bizituz joan nintzen eta azkenean 10 kilometroak nahiko erritmo bizian amaitu nituen.

Azkenean 2h 34' behar izan nituen 202, postuan amaitu nuelarik lasterketa.

Nahiz eta lasterketa ez nuen nahi eta espero bezala egin gustura geratu naizela esan daiteke. Argi dago oraindik hobetu beharra dagoela, baina bide honetik noala uste dut.

Hurrengo larunbatean (Maiatzak 18) Bilboko Iron Man erdia egingo dut. Gasteizerako lehenengo testa izango da. Ea ba nola joaten zaidan.

SAILKAPENA